I Rotary har vi ofte foredrag av fagfolk som gir oss ny kunnskap og ny innsikt. Torsdag 19. mars var slett ikkje noko unntak. Mange hadde bena seg for å høyre meir om hummaren.

Sverre Ola Roald er både fagmann og entusiast - han har arbeidd i Fiskeridirektoratet, og han fiskar hummar og forar dei i hummarkasse. Sjølv om mange av medlemmene i klubben har mykje erfaring med hummarfiske, var det ikkje mange som visste at "havets kardinal" var så fascinerande. Sverre fortalde om hummaren sin anatomi og levemåte - det vi kjenner til om denne skapningen , om at det er funne fossil av hummar frå kritt-tida, 140-145 millionar år sidan, lenge før dinosaurane vart utrydda, om storfiske og overfiske med katastrofal nedgang i bestanden langs alle kystar.

Men han kunne også fortelje om ei suksesshistorie med streng regulering og freding av småhummar og hummar med utrogn som no ser ut til å gi gode resultat og som gjer at bestanden no er i ferd med å ta seg opp att.